Кепилдик фонду менен Венгр-Кыргыз өнүктүрүү фонду ишкердикти колдоо боюнча макулдашты
«Кепилдик фонд» ААК менен Венгр-Кыргыз өнүктүрүү фонду КРда ишкердикти колдоого багытталган кызматташуу жөнүндө Макулдашууга кол коюшту.
Бул документ ишкерлердин каржылоого жеткиликтүүлүгүн кеңейтүү максатында тараптардын өз ара аракеттенүүсүн, айрыкча, жетишсиз күрөөгө ээ болгон ишкерлерге кепилдик берүү аркылуу насыя алууга шарт түзүүгө багытталат. Макулдашууга «Кепилдик фонд» ААКсынын Башкармасынын төрагасы Малик-Айдар Абакиров жана Венгр-Кыргыз өнүктүрүү фондунун Башкармасынын төрагасы Улан Сарбанов кол коюшту.
Кол коюу аземинде тараптар бул кызматташуу эки финансылык институт үчүн жаңы мүмкүнчүлүктөрдү ачып, өлкөдө ишкердикти колдоодо, айрыкча экспортко жана импортту алмаштырууга багытталган ишкерлерди өнүктүрүүдө маанилүү роль ойной турганына ишеним билдиришти.
