Кыргызстан менен Кытайдын соода жүгүртүүсү 22 млрд долларга жетти
Кыргызстан менен Кытайдын өкүлдөрү агроөнөр жай тармагында кызматташуу маселелерин талкуулады. Жолугушууда жашылча-жемиштер жана дарылык касиети бар өсүмдүктөрдүн үрөндөрүн өндүрүүдө биргелешкен иштерге өзгөчө көңүл бурулду. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Суусамыр өрөөнүндөгү алтыгана-карагана бадалын жок кылуу жана аны кайра иштетүү аркылуу тоют жана жер семирткич чыгаруу боюнча биргелешкен ишкана куруу да макулдашылды. Андан тышкары, картошка өстүрүүдө Кытайдын атайын техникалары, тажрыйба алмашуу жана адистерди даярдоо маселеси каралды.
Статистикалык маалыматка ылайык, Кыргызстан менен Кытайдын соода жүгүртүүсү 2024-жылы 23 млрд долларга жеткен, ал эми быйылкы жылдын тогуз айында 22 млрд долларды түздү. Айыл чарба продукцияларын экспорттоо көрсөткүчү эки эсеге өскөн.
Бул кызматташуу эки өлкөнүн соода алакасын кеңейтүүгө жана агроөнөр жай өндүрүшүн модернизациялоого чоң мүмкүнчүлүк түзөт.
