Талас облусуна келерки жылы 8 млрд сом бөлүнөт
Президенттин Талас облусундагы ыйгарым укуктуу өкүлү Эрмат Жумаев президент Садыр Жапаровго үстүбүздөгү жылы асфальт-бетон, темир-бетон жана таш майдалоочу заводдор курулганын билдирди. Ошондой эле жакынкы жылдары төө буурчакты кайра иштетүүчү завод куруу пландаштырылганын айтты.
Облустун инфраструктурасын жакшыртуу үчүн Кыргыз Республикасынын Турукташтыруу фондунан 1 млрд сом бөлүнгөн. Президент айткандай, анын 400 млн сому убагында иштетилбей артка кайтарылган.
Талас шаарында 28,5 км ички жолго асфальт төшөлүп, 54 км тротуар курулду. Суу алуучу жайдын жана көлөмү 2000 куб метр болгон резервуардын курулушу аяктап жатат. Бул бүт шаарды сапаттуу ичүүчү суу менен камсыздоого мүмкүндүк берет.
Мындан тышкары, облустун ар кайсы райондорунда суу менен камсыздоо маселелерин чечүүгө багытталган иштер улантылып жатат.
Ошондой эле Талас мамлекеттик университетинин беш кабаттуу кампусунун, 900 окуучуга ылайыкталган мектептин жана жети бала бакча имаратынын курулушу башталганы маалым. Турак жай куруу жаатында Мамлекеттик ипотекалык компания 310 батирлүү турак жай комплексин курууну улантып жатат.
Бул сапарында өлкө башчы келерки жылы облустун жолдорун оңдоого жана “Манас Ордо” комплексин реконструкциялоого 8 млрд сом бөлүнөрүн элге билдирди.
