Баткенде үч өлкөнүн жаштарынын катышуусунда эл аралык форум өтүүдө
Баткен облусунда "Жаштардын достук көпүрөсү: тынчтык, ынтымак жана кызматташтык" аталышындагы эл аралык жаштар форуму өтүүдө. Бул тууралуу президенттин Баткен облусундагы өкүлчүлүгүнөн билдиришти.
Маалымдалгандай, иш-чара жаш кол өнөрчүлөрдүн жана өндүрүүчүлөрдүн көргөзмө-жарманкеси менен башталды. Форумдун расмий бөлүгү Апаз Жайнаков атындагы Баткен облустук музыкалык драма театрында өттү.
Ага Кыргызстандын, Өзбекстандын жана Тажикстандын расмий өкүлдөрү, ошондой эле БУУнун Өнүктүрүү программасынын Кыргызстандагы туруктуу өкүлү Александра Соловьева катышты.
Форумда жаштардын коомдогу орду, коңшу мамлекеттердин ортосундагы достук мамилелерди чыңдоо жана кызматташтыкты өнүктүрүү маселелери талкууланды. Ошондой эле ийгиликке жетишкен жаштар өз тажрыйбалары жана жетишкендиктери менен бөлүштү.
Белгилей кетсек, форум президенттин Баткен облусундагы ыйгарым укуктуу өкүлүнүн аппаратынын демилгеси жана БУУнун Өнүктүрүү программасынын колдоосу менен уюштурулду.
