Финансы министрлиги 7 378 фермерге 934,6 млн сом каражат бөлгөн
14-ноябрда Финансы министрлиги “Кыргыз Республикасында сүт секторунун өндүрүмдүүлүгүн комплекстүү жогорулатуу” долбоорунун “Кошумча каржылоо” бөлүгүнүн жыйынтыктоочу иш-чарасын өткөрдү. Бул тууралуу Финансы министрлигинен билдиришти.
Иш-чараны Финансы министринин орун басары Нурбек Акжолов ачып, долбоордун алкагында фермерлерге бодо мал сатып алуу үчүн пайызсыз жана күрөөсүз ссудалар берилгенин белгиледи.
Финансы министрлигине караштуу Кредиттик линияны башкаруу бөлүмүнүн директору Бермет Мусакожоева долбоордун аткарылышы жана негизги көрсөткүчтөрү боюнча презентация жасады.
Жыйынтык боюнча Каражаттарды жүгүртүү фонду аркылуу 7 378 фермер жалпы 934,6 млн сом өлчөмүндө каржылоо алган. Фермерлер Ысык-Көл, Нарын жана Талас облустарында 4–8 адамдан турган сүт өндүрүүчү зайым алуучулар тобуна бириктирилип, жалпысынан кеминде 11 миң баш ири мүйүздүү мал сатып алышты.
Облустар боюнча бөлүштүрүү төмөнкүдөй:
- Ысык-Көл облусу — 2 372 адам, 311,8 млн сом (376 СӨЗТ)
- Нарын облусу — 2 468 адам, 311,8 млн сом (381 СӨЗТ)
- Талас облусу — 2 372 адам, 295,8 млн сом (426 СӨЗТ)
Финансы министрлиги мындай каржылоо фермерлердин өндүрүмдүүлүгүн жогорулатууга жана сүт секторун өнүктүрүүгө багытталганын белгиледи.
