Көл жээгиндеги унаа токтотуучу-пляждык территориялар бир дирекциянын карамагына өтөт
Кечээ Президенттин администрациясынын имаратында Президенттин иш башкармалыгынын жетекчиси Каныбек Туманбаев менен Ысык-Көлдөгү курорттордун, санатрорийлердин жана пансионаттардын жетекчилеринин жолугушуусу болгонун Президенттин иш башкармалыгынын маалымат кызматы билдирди.
К.Туманбаев президенттин жарлыгына ылайык эми бардык унаа токтотуучу-пляждык территориялар жаңы түзүлгөн дирекциянын балансына берилерин билдирген. Анын айтымында, бул зоналар буга чейин эле мамлекетке тиешелүү болгон, бирок, алар жергиликтүү өз алдынча башкаруу органдарынын карамагында болгон.
Эми алар кызмат көрсөтүүлөрдүн жалпы сапатын жогорулатуу максатында ошол территориялардын кароосуна, тазалыгына, тартибине бирдиктүү талаптарды камсыздай турган бир структурага өткөрүлөт.
Туманбаев ошону менен бирге эле мамлекеттин бизнеске кысып көрсөтүп, ижаралык ставкаларды жогорулатып же жеке сектордун ишмердүүлүгүнө чектөө коюу аракети жок экенин кошумчалады. Жолугушууга катышкан санаторийлер менен пансионаттардын жетекчилери сунушталган өзгөртүүлөрдү колдоп, дирекция менен жаңы форматта кызматташууга даяр экенин билдиришкен.
