Тигүү ишканаларынын экспорттук көйгөйлөрү талкууланды
Бүгүн Экономика жана коммерция министрлигинин имаратында "Кыргыз Экспорт" борбору тигүү жана текстиль ишканалары үчүн диалог аянтчасын өткөрдү. Бул тууралуу Экономика жана коммерция министрлигинин маалымат кызматынан билдиришти.
Иш-чарага ошондой эле КРнын Мамлекеттик салык кызматынын, Экономика министрлигине караштуу Бишкек стандартизация жана метрология борборунун, "Альфа Телеком" ЖАКсынын, КРнын Соода-өнөр жай палатасынын жана тиешелүү ассоциациялардын өкүлдөрү катышты.
Учурда тигүү тармагынын өкүлдөрү кыргыз продукциясын Россия Федерациясынын аймагына киргизүүдө, ошондой эле Wildberries маркетплейсине чыгууда кыйынчылыктарга туш болушууда.
Жолугушуунун жүрүшүндө Wildberries өкүлдөрү аянтчага чыгуу талаптарын, документтер, маркировка, сертификация жана логистика менен иштөөнүн өзгөчөлүктөрүн кеңири түшүндүрүштү.
Тараптар түзүлгөн кырдаалдан тез арада чыгуу жолдорун, тоскоолдуктарды жоюу чараларын жана продукциянын тышкы рынокторго тез чыгуу шарттарын талкуулашты.
Тигүү тармагынын өкүлдөрүнө "Кыргыз Экспорт" борбору жылдын аягына чейин ишкерлер үчүн бир катар окутуу иш-чараларын өткөрө турганы маалымдалып, окуудан калбай, активдүү катышууга чакырышты.
