ӨКМ ишмердүүлүгүндөгү финансылык бузуулар аныктады
Бүгүн Эсептөө палатасынын Кеңеши 2023–2024-жылдар үчүн Өзгөчө кырдаалдар министрлигинде жана анын карамагындагы түзүмдөрдө бюджеттин аткарылышына жүргүзүлгөн шайкештик аудиттин жыйынтыктарын карады.
Эсептөө палатасынын басма сөз кызматынан кабарлагандай, аудит учурунда жалпы 210,8 млн сом өлчөмүндө финансылык мүнөздөгү бузуулар катталган. Анын 156,8 млн сом калыбына келтирүүгө тийиш сумма катары көрсөтүлүп, 66,0 млн сому аудит маалында кайра өндүрүлдү.
Билдирүүгө караганда, Гидрометеорология кызматында катталган жалпы 157 бирдик жер тилкесинин ичинен 21 тилкенин мамлекеттик актысы жок экени аныкталды. Токой чарбаларында эсептелген чыгымдар жана жоготуулар өз убагында өндүрүлбөгөн. Жалпы 96,1 млн сомдук сумма ижарачылар тарабынан республикалык бюджетке толук түшүрүлө элек.
ERIC долбоору (жаратылыш кырсыктарынын тобокелдигине туруктуулукту жогорулатуу) 2023-жылы бекитилген бюджетти толук өздөштүргөн эмес — аткарылышы 13,7%ды түзгөн. COVID-19 ыкчам долбоорунун бүткөрүлүшү пландалган мөөнөттөн 2 жылга жакын узарып, 2024-жылдын октябрында аяктаган. Айрым каражаттар ыкчам чара көрүү максаттарына түз байланышы жок багыттарга бөлүнгөнү белгиленди. ӨКМге караштуу төрт түзүмдө 2023–2024-жылдары 1,9 млрд сомдон ашык капиталдык салымдар пайдаланылган. Аудиттин жүрүшүндө алардын ичинен 6,8 млн сомдук мүнөздүү бузуулар аныкталды.
Эсептөө палатасы министрлик системасындагы бюджеттик тартипти, долбоордук башкарууну жана ички көзөмөл механизмдерин жакшыртууга багытталган бир катар сунуштарды берди.
