"Кыргыз экспорт" жетекчиси Россияга товар импорттоодо эмнелерди эске алуу керектигин айтты
“Кыргыз экспорт” борборунун башчысы Урмат Такиров Россия лидери В.Путиндин “көмүскө импорт” көйгөйү тууралуу айткандарына түшүндүрмө берди.
Анын айтымында, Россия өзүнүн аймагынан өткөн бардык товарларга олуттуу көзөмөлдү бекитти. Ал көзөмөлдүн алкагында эми Казакстан менен чектешкен бардык чек ара пункттары текшерилип, кичинекей эле мыйзам бузуу жүктү кошумча текшерүүгө алып келиши ыктымал.
Ошондуктан продукцияны жөнөтүүдөгү жоопкерчилик тышкы экономикалык ишмердүүлүк процессинин ар бир катышуучусуна: өндүрүшчүгө, жүк ташуучуга жана жүктү кабыл алуучуга жүктөлөт.
Буга улай Такиров бир эле фурада бир нече компаниялардын продукциялары ташыларын кошумчалаган. “Эгер бир эле компанияда мыйзам бузуу болсо фурадагы бардык жүктөрдү текшертүүгө себеп табылат. Мурда Федералдык бажы кызматы чек арада турбаган болсо, эми бажы инспекторлору тандалма текшерүүдө ар бир маркировканы, QR кодду жана сертификатты текшеришет”, -дейт ал.
Ошондой эле ал рынок өзгөрүп жатканын, бизнес жаңы талаптарга көнүшү керектигин айтат. “Ушундай шартта иштеп кетүү – ишкер үчүн негизги тапшырма”,-дейт Такиров.
Такировдун айтымында, азыркы кырдаал компаниялардын ичинде, транспорттук уюмдар, салык кызматтары жана шайкештикти баалоо боюнча органдар тарабынан дыкат иштөөнү талап комплекстүү проблема.
