Кыргызстан блокчейн технологияларын өнүктүрүү боюнча эл аралык форумда тажрыйба бөлүштү
Женева шаарындагы Дүйнөлүк Соода Уюмунун маселелери боюнча КРнын Экономика жана коммерция министрлигинин өкүлчүлүгүнүн жетекчиси Нурбек Максутов 24-28-ноябрында Сенегалдын Дакар шаарында өткөн СЕФАКТ ООН (ЕЭК ООН Соода жана электрондук бизнес процедураларын жөнөкөйлөтүү борбору) 44-Форумуна катышты. Бул тууралуу Экономика жана коммерция министрлигинен билдиришти.
Форумдун алкагында Нурбек Максутов “Кыргыз Республикасынын блокчейн жаатындагы келечеги: санариптик трансформациядагы жаңычылдык” темасында панелдик сессияда сөз сүйлөп, эл аралык саясий диалогго катышты. Ал Кыргызстандын блокчейн технологияларын улуттук санариптик трансформациянын бир бөлүгү катары активдүү өнүктүрүп жатканын белгилеп, негизги инфраструктуралык элементтерди санап өттү: "Виртуалдык активдер жөнүндө" мыйзам (2022), Блокчейнди өнүктүрүү боюнча Улуттук Кеңеш (2025), санарип сомду киргизүү жана мамлекеттик блокчейн платформасын түзүү пландары.
Максутов ошондой эле адам ресурстарын жана коопсуздукту өнүктүрүү, университеттерде жаңы билим берүү программаларын киргизүү, мамлекеттик органдарда лицензиялоо жана көзөмөл системаларын бекемдөө боюнча иштер жүрүп жатканын белгиледи. Блокчейн сооданы жөнөкөйлөтүү, кагаз документооборотун азайтуу жана логистикалык процесстерде ачыктыкты жогорулатуу үчүн негизги инструмент катары каралууда.
Саясий диалогдун алкагында ал СЕФАКТ ООНдун вице-председаты катары транзиттик коридорлорду санариптештирүү жана туруктуу сооданы күчөтүү боюнча жүргүзүлгөн иш-чаралар тууралуу маалымат берди. Сурамжылоонун алдын ала натыйжалары өлкөлөргө саясатты гармонизациялоо, инфраструктураны модернизациялоо, стандарттар пакетин киргизүү жана киберкоопсуздукту камсыз кылуу зарыл экенин көрсөттү.
Кыргызстан эл аралык кызматташууну өнүктүрүүгө жана ишенимдүү санариптик экосистеманы түзүүгө даяр экенин баса белгиледи.
