А.Касымалиев: "Мамлекет майыптыгы бар адамдарга колдоону күчөттү"
МинКаб төрагасы Адылбек Касымалиев майыптыгы бар адамдардын иштери боюнча кеңештин жыйынын өткөрдү.
Ал Кыргызстанда майыптыгы бар адамдардын саны 2007-жылга салыштырмалуу 221 миң адамга (калктын 3%) чейин өсүшүн өкүнүү менен белгилеп, мамлекеттик колдоонун күчөтүлгөндүгү жөнүндө айтып берди.
"2022-жылдан тарта социалдык жөлөк пулдардын өлчөмү эки эсеге көбөйтүлдү. 2025-жылга республикалык бюджеттин долбоорунда бул максаттарга 8,6 млрд сом каралган, ошол эле учурда жөлөк пулдун орточо өлчөмүн (6 411 сом) жашоо минимумунун деңгээлине жеткирүү пландаштырылып жатат. Ушул жылы майыптык боюнча пенсияларга 7,6 млрд сом багытталган, анын орточо өлчөмү 9 600 сомго жетти", – деп белгиледи МинКаб башчысы.
"Социалдык ипотека" программасы боюнча 258 үй-бүлө турак жай менен камсыздалды. Мамлекеттик социалдык буйрутманын олуттуу өсүшү белгиленди: 2025-жылга 115 млн сом каралган, анын ичинен 51 млн сом майыптыгы бар адамдар үчүн кызмат көрсөтүүгө багытталган — бул 2022-жылга салыштырмалуу 5 эсеге көп.
