Кыргызстан менен Пакистандын өз ара соода жүгүртүүсү 200 млн сомго жеткирилет
4-декабрда Исламабад шаарында Кыргызстан президенти Садыр Жапаров Пакистандын премьер-министри Шахбаз Шариф менен сүйлөшүүлөрдү өткөрдү.
Тараптар Кыргызстан үчүн дүйнөлүк рынокторго чыгууда Пакистандын Карачи жана Гвадар портторун колдонуу мүмкүнчүлүктөрүн талкуулашты. Пакистан тарап бул жолугушууну тарыхый деп атап, жакынкы жылдары өз ара соода жүгүртүүсүн 200 млн долларга чейин көбөйтүүгө болорун белгиледи.
Ошондой эле эки тарап Пакистандын порттук инфраструктурасын колдонуу боюнча кызматташууну кеңейтүүгө макул болушту. Бул деңизге түз чыгышы жок Кыргызстан үчүн өзгөчө маанилүү. Ошондой эле лидерлер "Кытай — Кыргызстан — Өзбекстан" темир жолун куруунун региондун транзиттик мүмкүнчүлүктөрүн күчөтөрүн белгилешти.
Энергетика тармагында башкы приоритет — CASA-1000 долбоору бойдон калууда. Ал Борбордук жана Түштүк Азиянын энергетикалык интеграциясын чыңдоодо стратегиялык мааниге ээ.
Садыр Жапаров Бишкек Исламабадды ишенимдүү өнөктөш катары көрөрүн жана саясий диалогду жаңы деңгээлге чыгарууга умтуларын баса белгиледи. Тараптар жетишилген макулдашуулар экономикалык жана инфраструктуралык жалпы долбоорлорго жаңы дем берерине ишеним билдиришти.
