"Тазалыкка" эмнеге пакистандыктар алынып жатат?
Муниципалдык “Тазалык” ишканасында 420 бош орун бар экенин, жумушчулар жетишсиз болуп жатканын БШКнын турак жай-коммуналдык чарба, күйүүчү-майлоочу материалдар, транспорт, коммуникациялар жана экология боюнча туруктуу комиссиясынын жыйынында вице-мэр Рамиз Алиев билдирди.
Анын айтымында, жумушчулардын аз болуп жатканына айлык маяна, экинчиден, бул иштин келечексиз экендиги себеп болуп жатыптыр. “Андыктан таштанды чыгаруу боюнча тарифти көтөрмөйүн айлыкты көбөйтүү мүмкүн эмес. Бирок мен шаар тургундарын “Тазалыкка” жумушка орношууга чакырам”, — деди Рамиз Алиев.
Ишкананын жетекчиси Жолдошбек Чуштуков санитардык тазалоо, катуу тиричилик калдыктарын чыгарууда чындап эле көйгөйлөр бар экенин, ошондуктан чет элдик жарандарды тартып жатканын билдирди.
Аталган жыйында, кыргызстандык жарандарга 90 миң сом айлык берилсе да таштанды жүктөгүч катары иштешпегендиктен, пакистандыктар алынганы да айтылды. Депутаттардын бири пакистандыктар менен чектелбей, Бангладештен да жумушчу тартууну сунуштады. Анын айтымында, алар 35–40 миң сом айлыкка да макул.
Нардеп Рысбай Аматов кызматтарды аутсорсингге өткөрүүнү сунуштады. “Кадр жок экен, анда жеке компаниялар иштесин, алар бүт шаарды тазалашат. Өнүккөн шаарларда гүл отургузууга чейин аутсорсингге беришет. Пилоттук долбоорлорду баштоо керек, микрорайондорго, жашыл массивдерге бөлүп, ошол эле Новопокровкадан баштасаңар болот”, -дейт ал.
Рамиз Алиев жеке компанияларга берүүнүн негативддүү тажрыйбасы бар экенин билдирди. “Шаар боюнча 3-4 компания иштеп жатат, бирок алар өз милдеттемелерин аткарбай жатышат. Ошондой эле шаарда 1 млн 500 адам болсо анын 3/1 базада жок”, дейт Р.Алиев.
