Кыргызстанда мектепке чейинки билим берүү менен камтуу 50%га жакындады
Кыргызстанда мектепке чейинки билим берүү боюнча камтуу дээрлик 50 пайызды түзгөнүн Билим берүү министрлиги маалымдады. Ведомствонун маалыматына караганда, 2024/25-окуу жылында мектепке чейинки билим берүүнүн бардык түрлөрү жана формалары, анын ичинде мектепке даярдоо боюнча балдардын камтылышы 44,3 пайызды түзгөн. Жакынкы жылдары бул көрсөткүчтү 60 пайызга жеткирүү максат кылынууда.
Министрлик 2025-жылы буга чейин мыйзамсыз менчиктештирилип кеткен 25 бала бакчанын имараты мамлекетке кайтарылып, түз максатында пайдаланууга берилгенин кошумчалады.
Ошондой эле өлкө аймактарында 560 мектепке чейинки билим берүү уюмдары түзүлгөн:
- 500 кыска мөөнөттүү болуу режиминдеги бала бакча,
- 60 өнүгүү борбору.
Билим берүү тармагында негизги мамлекеттик кызматтарды бириктирген заманбап санариптик инфраструктура да ишке киргизилди.
“Билим” порталы — билим берүү жаатындагы бардык негизги мамлекеттик кызматтарды бирдиктүү платформада камтыган заманбап санариптик система. Портал аркылуу эми мектептерге, бала бакчаларга, кесиптик лицейлерге кабыл алуу, ошондой эле жеке билим берүү уюмдарын лицензиялоо жана башка мамлекеттик кызматтар көрсөтүлөт. Колдонуучулар арыздарды онлайн тапшырып, алардын жүрүшүн көзөмөлдөй алышат.
