Бир адамга эсептелген реалдуу киреше айына 11 240 сом болду
Үй чарбаларын тандалма сурамжылоо жыйынтыгына ылайык, 2025-жылдын I жарым жылдыгында калктын номиналдык акчалай кирешелери 480,2 млрд сомду түзүп, өткөн жылдын ушул мезгилине салыштырмалуу 4,9%га өскөнү статистикалык маалыматтарда айтылат.
Акчалай кирешелердин түзүмүндө негизги үлүш эмгек ишмердүүлүгүнөн түшкөн кирешелерге туура келди — 80,2%. Социалдык трансферттер 12,8%, ал эми жеке кошумча чарбада өндүрүлгөн айыл чарба продукциясын сатуу 4,5% түздү.
Ошол эле учурда 2025-жылдын I жарым жылдыгында бир адамга эсептелген реалдуу акчалай кирешелер айына 11 240 сомду түзүп, былтыркы жылдын ушул мезгилинен 4%га төмөн болду.
Бир адамга эсептелген пайдаланууга мүмкүн болгон (милдеттүү төлөмдөр жана салымдар алынгандан кийинки) акчалай кирешелер республика боюнча айына 11 393,5 сомго жетти. Ошол эле маалда региондор ортосунда олуттуу айырмачылык сакталууда.
Республика боюнча орточо деңгээлден жогору болгон аймактар:
- Бишкек шаары — 3 708 сомго жогору,
- Ош шаары — 248,7 сомго жогору,
- Чүй облусу — 434,8 сомго жогору.
Орточо деңгээлден төмөн кирешелер катталган аймактар:
- Нарын облусу — 3 241,8 сомго төмөн,
- Ысык-Көл облусу — 2 167,7 сомго төмөн,
- Талас облусу — 1 677,1 сомго төмөн,
- Жалал-Абад облусу — 931,5 сомго төмөн,
- Баткен облусу — 857,5 сомго төмөн,
- Ош облусу — 694,1 сомго төмөн.
