6 жылдын ичинде бажы төлөмдөрүнүн түшүүлөрү болжол менен 7,4 эсе өстү
6 жылдын ичинде бажы төлөмдөрүнүн түшүүлөрү болжол менен 7,4 эсе өстү - 2020-жылы 21,3 млрд сомдон, 2025-жылдын жыйынтыгы менен 158 млрд сомду түздү. Ал эми ушул жылдын 9 айынын жыйынтыгы менен 138, 9 млрд сом чогултулду. Бул бажылык администрациялоону модернизациялоонун негизги натыйжаларынын бири гана. Мындай билдирүүнү Бажы кызматынан кабарлашты.
Билдирүүгө караганда, бажыны өнүктүрүү бул бюджетке түшкөн каражатты көбөйтүү гана эмес, санариптик кызмат көрсөтүүлөрдү, жол-жоболорду жөнөкөйлөтүү, логистиканы өркүндөтүү жана тышкы соода үчүн ыңгайлуу шарттарды түзүү болуп саналат.
Ушул жана башка маселелер тууралуу кече, Бишкекте өткөн “Заманбап бажы: санариптик трансформация, эл аралык кызматташтык жана бизнес менен өнөктөштүк” аттуу эл аралык форумда талкууланды.
Маалыматка ылайык, иш-чаранын катышуучулары “Бирдиктүү терезе” механизмин өнүктүрүүнү, уруксат берүү жол-жоболорун санариптештирүүнү, административдик тоскоолдуктарды жоюуну жана ТЭИ катышуучуларынын убактылуу жана финансылык чыгымдарын кыскартуу мүмкүнчүлүктөрүн ортого салышты.
Аталган форум кече күнү, Министрлер Кабинетинин Төрагасынын Биринчи орун басары Данияр Амангельдиев, Дүйнөлүк бажы уюмунун Башкы катчысы Иэн Сондерс, Түрк мамлекеттер уюмуна мүчө-мамлекеттердин бажы кызматтарынын жетекчилери, мамлекеттик органдардын жана бизнес-коомдоштуктардын өкүлдөрүнүн катышуусунда өткөн.
