Кыргызстанда Англиядагы сезондук иштерге онлайн-каттоо ачылды
Эмгек министрлигине караштуу Чет өлкөдө жарандарды жумушка орноштуруу борбору Улуу Британияда HOPS Labour Solutions Ltd компаниясы аркылуу сезондук айыл чарба иштерине онлайн-каттоо башталарын билдирди.
Каттоо 2025-жылдын 8-декабрында саат 12:01де ачылып, 11-декабрда саат 23:59да (Бишкек убактысы) жабылат. Өтүнмөнү www.migrant.kg Борбордун www.migrant.kg расмий сайты жана info.migrant.kg instagram-баракчасы аркылуу берсе болот.
Каттоого катышуу үчүн жарактуу чет өлкөлүк паспорт жана паспорттогу аты-жөнүңүзгө ылайык түзүлгөн Gmail электрондук почтасы талап кылынат. Онлайн-каттоо программага болгон кызыгууңузду гана тастыктайт жана кийинки этаптарга катышууга кепилдик бербейт.
Орус тили боюнча онлайн-тест 2026-жылдын январында, персоналдык маектешүүлөр февралда өтөт. Иш апрель айынын башында башталат. Эмгек акы — саатына 12,71 фунт стерлинг, жумасына минималдуу 32 саат. Визанын баасы — 319 фунт, авиабилет өзүнчө төлөнөт.
Талапкерлер 18 жаштан жогору, орус тилин жакшы билген, ошондой эле физикалык жана психологиялык абалы канааттандырарлык болушу керек. HOPS аялдардан түшкөн арыздарды кубаттайт. Мурда HOPS программасы менен Улуу Британияда иштегендер түздөн-түз оператор менен байланышууга тийиш.
Тандоо процесси толугу менен HOPS тарабынан жүргүзүлөт. Жумушка орноштуруу борбору тандоого катышпайт. Программа толук акысыз. Эгер кимдир бирөө акча талап кылса же шектүү аракеттер катталса, билдирүүсү Complfints@hopls.com дарегине жөнөтүлүшү керек.
