Адабият күнүндө "Алтын калем" адабий сыйлыгы тапшырылды
Кечээ Улуттук адабият күнүнө карата Улуттук жазуучулар союзунун салтанаттуу иш-чарасы Тарых музейинде өттү. Салтанатта көптөн күткөн "Алтын калем" сыйлыгынын жана бир катар адабий сыйлыктардын жеңүүчүлөрү жарыяланды.
Улуттук жазуучулар союзунун төрагасы Каныбек Иманалиев акын, жазуучуларды майрамы менен куттуктап, кийинки жылы залкар акын Турар Кожомбердиевдин 85 жылдыгын, адабиятчы, сынчы Салижан Жигитовдун 90 жылдыгын өткөрүү, Дүйнөлүк поэзия фестивалын Кыргызстанда уюштуруу жана "Ала Тоо" журналын кайра басып чыгаруу пландары тууралуу билдирди.
МинКаб төрагасынын орун басары Эдиль Байсалов жана Маданият, маалымат жана жаштар саясаты министри Мирбек Маматалиев да куттуктоо сөздөрүн сүйлөп, акын-жазуучуларга колдоо көрсөтүү максатында келерки жылы каражатты 5 миллион сомдон 10 миллион сомго көтөрүлөрүн билдиришти.
Салтанаттуу кечеде конкурс тарабынан тандалган мыкты чыгармалардын авторлоруна дипломдор жана акчалай сыйлыктар тапшырылды.
"Алтын калем" адабий сыйлыктарынын — жеңүүчүлөр:
Проза жанры
Нуриза Өмүрбаева — 100 000 сом
Поэзия жанры
Өмүрбек Тилебаев — 100 000 сом
Драматургия жанры
— Бул номинация боюнча татыктуу жеңүүчү табылган жок.
Котормо жанры
Алтынбек Исмаилов — 100 000 сом
Адабий сын
Аскар Медетов — 100 000 сом
Балдар адабияты
Жекшенбай Курманов — 100 000 сом
Орус тилдүү чыгармалар
Светлана Луговая жана Алла Пятибратова — ар бири 50 000 сом
Атактуу адабий сыйлыктын ээлери:
Мелис Мамажан уулу — "Деңиз дүйнө" китеби үчүн "Алыкул Осмонов" атындагы адабий сыйлыкка ээ болду.
Абибилла Пазылов — "Чын курандын жетиси" романы үчүн "Мукай Элебаев" атындагы адабий сыйлыкты алды.
"Тоголок Молдо" атындагы балдар адабий сыйлыгы — Жумабек Токтагазиевге ыйгарылды.
