ЕАЭБ алкагында электрондук соода жана маркалоо маселелери талкууланды
11-декабрда Москва шаарында Евразия өкмөттөр аралык кеңешинин кезектеги жыйыны өттү. Анда Евразия экономикалык биримдигинин (ЕАЭБ) алкагында экономикалык интеграцияны өнүктүрүүнүн негизги багыттары талкууланды. Бул тууралуу Экономика жана коммерция министрлигинин маалымат кызматынан билдиришти.
Жыйынга КРнын Экономика жана коммерция министрлигинен министрдин орун басары Султан Ахматов катышты.
Жолугушууда ЕАЭБдин стратегиялык документтерин ишке ашыруу маселелери, анын ичинде 2025-жылга чейинки стратегия жана 2030–2045-жылдарга карата экономикалык өнүгүү боюнча декларация каралды. 2025-жылга чейинки стратегиянын аткарылышы тууралуу комплекстүү баяндама 2026-жылдын май айында ЕАЭБге мүчө мамлекеттердин башчыларына сунушталары белгиленди.
Ошондой эле электрондук сооданы өнүктүрүү үчүн жагымдуу шарттарды түзүү, тиешелүү укуктук актыларды кабыл алууну тездетүү жана товарларды маркалоо тутумун өркүндөтүү маселелерине өзгөчө көңүл бурулду.
Кабыл алынган чечимдер соода процесстерин, анын ичинде электрондук сооданы жөнөкөйлөтүүгө, улуттук өндүрүүчүлөрдүн атаандаштыкка жөндөмдүүлүгүн жогорулатууга жана Кыргызстандын экономикалык өсүшүнө кошумча түрткү берери белгиленди.
