2021-2024-жылдарда түз инвестициялар 140%дан ашык өскөн
Министрлер Кабинетинин Төрагасы Адылбек Касымалиев “Инвестициялык багыт: мамлекет жана бизнес” форумунда өлкөнүн инвестициялык стратегиясы жана соңку жетишкендиктер тууралуу айтып берди. Бул тууралуу Өкмөттүн басма сөз кызматынан билдиришти.
Ал акыркы беш жылда Кыргызстандын ички дүң продукциясы дээрлик үч эсеге көбөйгөнүн, быйылкы 11 айда ИДП өсүшү 10,2%га жеткенин белгиледи. Ошондой эле 2021-2024-жылдар аралыгында түз инвестициялардын орточо жылдык көлөмү 1995-2020-жылдарга салыштырмалуу 140%дан ашык өскөн.
Адылбек Касымалиев инвестициянын маанисин: экономикалык өсүш, туруктуулук жана келечектин стратегиялык өнүгүүсүнүн негизги булагы катары сыпаттап, гидроэнергетика, логистика, айыл чарба, тоо-кен, IT, халал индустриясы, туризм жана фармацевтика тармактарына көңүл бурулуп жатканын айтты.
Мындан тышкары, жакында Президент кол койгон “Инвестициялар боюнча улуттук агенттиктин статусун жогорулатуу жана ролун күчөтүү” Жарлыгы өлкөдө стратегиялык инвестицияны ыкчам жылдырууга өбөлгө түзөрүн кошумчалады.
Адылбек Касымалиев инвесторлорду келечектүү демилгелерди сунуштоого чакырып, биргелешкен күч-аракет менен атаандаштыкка жөндөмдүү экономиканы бекемдөө мүмкүндүгүн белгиледи.
