"Кыргызстан аэропорттору" ААКы модулдук дата-борбор куруу боюнча тендер жарыялады
"Кыргызстан аэропорттору" ачык акционердик коому модулдук маалыматтарды иштетүү борборун куруу боюнча кызматтарды сатып алууну стандарттык ачык (чектөөсүз) тендер формасында баштады. Техникалык тапшырмага ылайык, дата-борбор заманбап муздатуу жана өрт коопсуздугу системалары менен жабдылат.
Долбоордун пландалган суммасы — 41,2 млн сом. Сунуштар 2025-жылдын 19-декабрына чейин, саат 16:50гө чейин кабыл алынат. Сунуштун жарактуулук мөөнөтү — 55 күн, ал эми тендердик камсыздоо сунуш суммасынын 2%ын түзүп, 65 күнгө берилет.
Долбоорго ылайык, дата-борбор Бишкек шаарындагы "Манас" эл аралык аэропортунун аймагында курулат. Келишимге кол коюлуп, каттоодон өткөндөн кийин иштер 150 календардык күндүн ичинде аткарылышы керек.
Дата-борбордун курамына төмөнкүлөр кирет:
- сервердик мамылар;
- модулдук электр менен камсыздоо жана муздатуу системалары;
- муздак жана ысык аба коридорлору;
- мониторинг системалары;
- кирүүнү көзөмөлдөө;
- видеокөзөмөл;
- өрт сигнализациясы жана газ менен өрт өчүрүү системалары.
