Кыргыз-өзбек соода алакасы: Ферганада жаңы соода мүмкүнчүлүктөрү ачылды
Кыргыз Республикасынын Өзбекстандагы Соода өкүлчүлүгү Фергана облусуна жумушчу сапар менен барды. Иш сапардын алкагында эки өлкөнүн соода-экономикалык байланыштарын кеңейтүү жана бекемдөө маселелери талкууланды. Бул тууралуу Экономика жана коммеция министрлигинен билдиришти.
Маалыматка ылайык, өзбек тараптын Соода-өнөр жай палатасынын аймактык башкармалыгы менен биргеликте Фергана облусундагы ири ишканалар менен жеринде таанышуу иш-чаралары уюштурулду.
Тараптар төмөнкү ишканаларга барышты:
- Tantana Textile — текстиль продукциясын өндүрүү;
- Narimtex — сырткы кийимдер жана жүндөн токулган кездемелер, кызматташтыкты, анын ичинде толлинг схемасы боюнча форматтарды караууга кызыкдар экенин билдирди;
- ROF FOOD — ширелер жана консервацияланган продукция, кыргыз жеткирүүчүлөрдөн алмаларды түздөн-түз сатып алууга даяр.
Соода өкүлчүлүгү Фергана облусунун ири экономикалык потенциалына көңүл буруп, өз ара пайдалуу кызматташтыкты өнүктүрүүгө ачык экенин билдирди. Фергана тарап да соода жана ишкердик алакаларды активдештирүүгө ар тараптуу колдоо көрсөтүүгө даяр экенин баса белгиледи.
