Кыргызстан товарлары эми Европа, Түркия, Кара деңиз аймагына чыгат
Кыргызстан Европа – Кавказ – Азия транспорт коридорунун (ТРАСЕКА) көп тараптуу уруксаттар системасына кошуларын Транспорт жана коммуникациялар министрлигинен билдирди.
ТРАСЕКА уруксаты ташуучуга системага кирген бардык мамлекеттердин аймагы аркылуу эркин каттоого укук берип, өзүнчө эки тараптуу макулдашуулардан бошотот.
ТРАСЕКА уруксаты бир жолку колдонууга арналган жана бир айлампа сапардын алкагында жүк менен же жүксүз түз жана кайра каттамды аткарууга укук берет. Мында системага кирген кайсы бир өлкөгө кирип-чыгуунун саны эки жолудан ашпоого тийиш.
Аталган уруксат универсалдуу болуп эсептелет жана эки тараптуу, транзиттик, ошондой эле үчүнчү өлкөлөргө/үчүнчү өлкөлөрдөн ташууларды жана алардын айкалышкан түрлөрүн жүзөгө ашырууда колдонулушу мүмкүн.
Мындан ары Кыргызстандын эл аралык автомобиль ташуучулары ТРАСЕКАнын бирдиктүү көп тараптуу уруксатын колдонуу менен транзиттик, эки тараптуу, ошондой эле Армения, Грузия, Молдова, Румыния, Түркия жана Украинага жүк ташууларды жүргүзүү боюнча кошумча мүмкүнчүлүккө ээ болушат.
Бул Кыргызстандын эл аралык ташуучулары үчүн ыңгайлуу шарттарды түзүп, кыргыз товарларынын Европа, Түркия жана Кара деңиз аймагындагы рынокторго чыгышын жеңилдетет жана транспорттук чыгымдарды жана жеткирүү убактысын кыскартуу аркылуу экспорттун атаандаштыкка жөндөмдүүлүгүн жогорулатат.
