Кыргызстандыктар медициналык укуктарын санарип сервистен билсе болот
МинКаб жыйынында "Өкмөттүк акселераторлор" программасынын алкагында ишке ашырылып жаткан эки жаңы реформанын жыйынтыгы чыгарылып, кыргызстандыктар "Саламаттыкка укук" сервиси аркылуу өздөрүнүн медициналык укуктары тууралуу маалымат ала алары маалымдалды.
Мындан ары милдеттүү медициналык камсыздандыруу менен камтылган 5,2 миллиондон ашык жаран (калктын 70%ы) жеке медициналык укуктары жана жеткиликтүү кызматтар тууралуу маалыматты тез жана оңой ала алышат. Сервиске кирүү "Түндүк" мобилдик тиркемеси аркылуу мүмкүн.
Мамлекеттик кепилдиктер программасы көптөн бери жарандарды акысыз медициналык кызматтар менен камсыздап келет. Бирок Министрлер кабинети белгилегендей, маалыматтын жетишсиздигинен жана ыңгайлуу инструменттин жоктугунан анын натыйжалуулугу чектелип келген. Ушуга байланыштуу "Өкмөттүк акселераторлор" программасынын 100 күндүк циклинин алкагында "Саламаттыкка укук" аттуу санариптик сервис ишке киргизилди.
Министрлер кабинетинин төрагасы Адылбек Касымалиев 2025-жылы реформалардын жаңы цикли башталганын жана анын алкагында эки багыт боюнча жыйынтыктар чыгарылганын, анын ичинде кепилденген медициналык кызматтардын жеткиликтүүлүгүн жогорулатуу маселеси бар экенин билдирди. Анын айтымында, бул сервис медициналык кызматтарды калк үчүн кыйла жеткиликтүү кылат.
