11 айда негизги капиталга 283 млрд сом инвестиция салынды
2025-жылдын январь-ноябрынын жыйынтыгы боюнча Кыргызстанда негизги капиталга инвестициялардын көлөмү 283,2 млрд сомду түзүп, өткөн жылга салыштырмалуу 18,1%га өстү. Бул тууралуу Экономика жана коммерция министрлигинен билдиришти.
2025-жылдын 11 айында каржылоонун бардык булактарынан негизги капиталга инвестициялардын көлөмү 283,2 млрд сомду түзүп, 2024-жылдын тиешелүү мезгилине салыштырмалуу 18,1%га өстү. Өсүш каржылоонун ички булактарынан 18,2%, тышкы булактардан 17,5% менен камсыздалган.
Инвестициялардын негизги бөлүгү (жалпы көлөмдүн 82,3%) пайдалуу кен казуу, транспорт жана логистика, энергетика, иштетүү өнөр жайы, билим берүү объектилери жана турак жай курулушуна багытталган.
Капиталга инвестициялардын өсүшүн төмөнкү факторлор менен байланыштырууга болот:
- "Менин үйүм" программасынын алкагында 4662 батирдин курулушу аяктады;
- Байланыш тармагын өнүктүрүүгө, анын ичинде MegaCom жана О! операторлору тарабынан жаңы базалык станциялар курулду (өсүш 19,2%);
- Билим берүү жана спорт объектилерин курууга инвестициялардын өсүшү (18,3%);
- Бишкек жана Ош шаарларында инфраструктураны өнүктүрүү;
- Туризм жана туристтик инфраструктурага инвестициялардын көбөйүшү.
Ошол эле мезгилде курулуштун дүң продукциясынын көлөмү 318,9 млрд сомду түзүп, 29%га өстү. Курулуш секторунун ИДПга салымы 2,13 пайыздык пунктка бааланып, жалпы ИДП түзүмүндө курулуштун үлүшү 8,6%га жетти.
Бул көрсөткүчтөр экономиканы капиталдаштыруу жана инфраструктураны өнүктүрүү боюнча жүргүзүлгөн иштердин натыйжасын көргөзүүдө.
