Кызмат көрсөтүү тармагы экономикалык өсүштүн 49,3%ын түздү
2025-жылдын январь-ноябрь айларынын жыйынтыгы боюнча кызмат көрсөтүү тармагы дүң продукциясынын көлөмү 1 236 млрд сомду түзүп, 2024-жылдын тиешелүү мезгилине салыштырмалуу 9,3%га өстү. Бул сектор ИДПнын өндүрүш структурасында 49,3% үлүшүн ээлеп, экономикалык өсүшкө эң чоң салым кошууну улантууда. Бул тууралуу Экономика жана коммерция министрлигинен билдиришти.
Калктын кирешелеринин өсүшү, керектөө насыяларынын көбөйүшү жана ички суроо-талаптын бекемделиши кызмат көрсөтүү чөйрөсүнүн жигердүү өнүгүүсүнө өбөлгө түздү. Натыйжада:
- Дүң жана чекене соода, ошондой эле автомобилдерди жана мотоциклдерди оңдоо 15,1%га өсүп, 429,2 млрд сомду түздү. Чекене соода көлөмү негизги өсүштү камсыздады (16,9%га).
- Транспорттук кызматтар жана жүктөрдү сактоо 10,0%га өсүп, 112,7 млрд сомду түздү. Бардык түрдөгү транспорт менен 54,4 млн тонна жүк (11,9%га өсүү) жана 603,5 млн жүргүнчү (4,1%га өсүү)ташылды.
- Мекемелер жана ресторандар көрсөтгөн кызматтар 15,9%га өсүп, 57,5 млрд сомду түздү.
- Маалымат жана байланыш кызматтарынын дүң көлөмү 56,7 млрд сомду түзүп, 106,1% өсүш болду.
Сектордун ИДПга кошкон салымы 4,56%дык пункт деңгээлинде бааланып, экономиканын туруктуу өсүшүнө олуттуу салым кошууда.
Кызмат көрсөтүү чөйрөсүнүн жигердүү өсүшү жана ички суроо-талаптын бекемделиши экономикалык туруктуулукту колдоого багытталган маанилүү фактор болуп эсептелет.
