Financial Times 2026-жылдагы маанилүү окуялар боюнча божомолун жарыялады
Financial Times саясий, экономикалык жана технологиялык багыттарды камтыган 2026-жылга карата жылдык божомолун жарыялады.
Саясат жана геосаясат боюнча Financial Times аналитиктеринин божомолдору:
- FTнин баамында, Дональд Трамп жыл аягына чейин рыноктордун басымы, инфляция жана соода өнөктөштөрүнүн каршылыгынын айынан эң катуу тарифтик коркутууларынан баш тартат.
- Украина Донбасстан баш тартуусу аскердик толук кыйроо болгон учурда гана мүмкүн деп эсептешет FT аналитиктери.
- АКШда Демократиялык партия Конгресстин Өкүлдөр палатасын кайра көзөмөлгө алышы ыктымал. Бул аларга Дональд Трамптын күн тартибин бөгөттөп, иликтөөлөрдү баштоого мүмкүнчүлүк берет.
- Сауд Аравиясы Израиль менен мамилелерди нормалдаштырууга барбайт деген божомол бар.
- Германия ультраоңчул AfD партиясына карата саясий "санитардык кордонду" сактап калат.
Экономика жана финансы тармагындагы божомолдор:
- Көпчүлүк борбордук банктар пайыздык чендерди төмөндөтүүнү улантат; Япония бул жагынан өзгөчө учур болуп калат.
- Кытайдын соода профицити рекорддук деңгээлге жетсе да, юань олуттуу түрдө бекемделбейт.
- Жеке кредиттөө секторунда дефолттор көбөйөт, бирок системалык каржылык кризис болбойт.
- Алтындын баасы трой унциясы үчүн 5 миң доллардан ашышы мүмкүн.
- Африканын экономикалык өсүү темпи биринчи жолу Азиядан бир аз жогору болушу ыктымал.
Технологиялар тармагында эмнелер күтүлөт:
- Жасалма интеллект тармагындагы өнүгүү басаңдай баштайт: ири технологиялык компаниялар туруктуулугун сактайт, ал эми венчурдук жана чакан компаниялар жоготууларга учурайт.
- 2026-жылы коммерциялык жактан ишке жарамдуу кванттык компьютер пайда болушу күмөн.
- Гуманоид роботтор рынокко чыгат, бирок кымбат жана чектелүү (нишалык) продукт бойдон калат.
- Толук бойдон жасалма интеллект тарабынан түзүлгөн ыр дүйнөлүк музыкалык чарттардын башына чыга албайт.
Бизнес жана рыноктор:
- FTнин божомолуна ылайык, Tesla АКШда, Европада жана Кытайда жоготкон позицияларын калыбына келтире албайт.
- Илон Маск негизги көңүлүн салттуу автоөндүрүшкө эмес, жасалма интеллектке жана роботаксилерге бурат.
Редакция белгилегендей, өткөн жылдагы божомолдор рекорддук деңгээлде так эмес болуп чыккан: 2025-жылы 20 божомолдун 7си ишке ашкан эмес — бул долбоор тарыхындагы эң начар жыйынтык. Бул бүгүнкү дүйнөнүн өнүгүшүн алдын ала айтуу канчалык татаал экенин айкын көрсөтүп турат.
