Сокулукта сафлор аянтын кеңейтүү максат кылынып жатат
Кыргыз мамлекеттик асыл тукум заводу сафлордон алынган жымыхты малдарга тоют катары колдонуу менен айыл чарба тармагында кошумча баалуулук жаратууну максат кылууда.
Суу ресурстары, айыл чарба жана кайра иштетүү өнөр жайы министрлигинен билдиришкендей, Сокулук райондук мамлекеттик өнүктүрүү фонду тарабынан аталган чарбага керектүү жабдыктар алынып берилди. Учурда чакан цех сафлор айдоону өздөштүрүп, өсүмдүк майын өндүрүү менен алектенип жатат.
Адистердин айтымында, сафлор 1 гектар жерден орточо 1 тонна, ал эми туура агротехникалык кароо жүргүзүлгөндө 5 тоннага чейин түшүм бере алат. Өсүмдүктөн алынган майдын чыгымы 40%га чейин жетип, экологиялык жактан таза азык катары керектөөчүлөргө сунушталат.
Сокулук районунун ылдыйкы зонасында 50 миң гектарга жакын айдоо аянттары бар, анын жарымы кайрак жерлер. Буга чейин бул аймактарда негизинен буудай жана арпа өстүрүлүп келген. Бирок, сафлор өстүрүү экономикалык жактан бул өсүмдүктөргө салыштырмалуу кыйла кирешелүү экендиги белгиленүүдө.
Ошондой эле министрлик тарабынан фермерлерди жана дыйкандарды сафлор майын өндүрүүгө тартуу, заманбап үрөндөр менен камсыз кылуу, техника менен колдоо көрсөтүү жана продукцияны кайра иштетүүдөн тартып даяр товарга чейин жеткирүүгө көмөктөшүү мүмкүнчүлүктөрү каралып жатат.
