Чүйдө инвесторлор менен иштөө кластердик ыкмага өтөт
Чүй облусунда инвестиция тартуу жана инвесторлор менен иштөөдө бирдиктүү механизмдердин жоктугунан улам жаңы ыкма киргизилет. Бул тууралуу президенттин Чүй облусундагы өкүлү Азамат Осмонов облустук коллегияда билдирди.
Анын айтымында, аймакты системалуу өнүктүрүү максатында негизги 6 комплекстүү долбоордун бири катары "Чүй инвестиция"долбоору кабыл алынды. Долбоор инвесторлор үчүн ачык, түшүнүктүү жана ырааттуу иш алып баруу системасын түзүүгө багытталган.
Ошондой эле Чүй облусунда айрым өндүрүш объекттери турак жайларга, мектептерге жана бала бакчаларга жакын жайгашып, экологиялык талаптар сакталбай келгендиги белгиленди. Ушуга байланыштуу 2026-жылдан тартып облус аймагында бардык жаңы объекттерди жайгаштырууда кластердик ыкма милдеттүү түрдө колдонулат.
Бул ыкма бизнес менен калктын ортосундагы мамилени жөнгө салууга, элдин ден соолугун коргоого жана аймакты туруктуу өнүктүрүүгө шарт түзөт.
Белгилей кетсек, бүгүн Чүй облустук администрациясында 2026-жылга карата иш-пландар жана келечектүү долбоорлор талкууланган коллегия өттү.
