Ишкерлер, юридикалык жана жеке жактар үчүн жеңилдиктер күчүнө кирди

Президент Садыр Жапаров кол койгон "Кыргыз Республикасынын айрым мыйзам актыларына салык салуу, социалдык камсыздандыруу жана салыктык эмес кирешелер чөйрөсүндө өзгөртүүлөрдү киргизүү жөнүндө" мыйзамы күчүнө кирди.

Эске салсак, бул мыйзамдын максаты 2025-жылдын 5-декабрындагы Президенттин № 350 "Экономиканын айрым тармактарын колдоо боюнча чаралар жөнүндө" жарлыгын ишке ашыруу, ошондой эле мыйзамдарды өркүндөтүү, укуктук жөнгө салуунун ачык-айкындуулугун жана натыйжалуулугун жогорулатуу болуп саналат.

Мыйзамдын негизги жоболору:

— зергерчилик өндүрүшүнө арналган жабдуулар, технологиялар, реактивдер жана жарым фабрикаттар кошумча нарк салыгын (КНС) төлөөдөн бошотулат;

— жеке жана юридикалык жактар 2029-жылдын 1-январына чейин жеңил автомототранспорт каражаттарын сатууда салыктарды төлөөдөн бошотулат;

— жеке ишкер катары катталбаган жеке адамдар 2026-жылдын 1-январына чейин автомототранспорт каражаттарын сатуу менен алынган кирешелер боюнча салыктарды, анын ичинде өсүмпулдарды жана санкцияларды төлөө милдеттенмелеринен бошотулат;

— Кыргыз Республикасынын ишканалары тарабынан өндүрүлгөн жана/же чогултулган транспорт каражаттарын жана аларга тетиктерди чыгарган өндүрүүчүлөр бул продукцияны сатууда сатуудан алынуучу салыктан бошотулат;

— 2030-жылдын 1-январына чейин тигүү жана текстиль өнөр жайынын бардык субъекттери үчүн орточо айлык эмгек акысынан көз карандысыз бирдиктүү камсыздандыруу төлөмдөрүнүн ставкалары, ошондой эле тигүү жана текстиль тармагында иштеген кызматкерлердин орточо айлык эмгек акысынан 1% өлчөмүндө киреше салыгынын минималдуу ставкасы белгиленет;

— мүлктү ижарага берүүнү жүзөгө ашырган адамдар үчүн камсыздандыруу төлөмдөрүнүн ставкасы кыскартылган орточо айлык эмгек акысынан 6% өлчөмүндө аныкталат;

— Кыргыз Республикасынын аймагынан тышкары жүргүзүлгөн ишмердүүлүк үчүн бирдиктүү салыктын ставкасы 0,1%га чейин төмөндөтүлдү (азыркы ставка — 1%);

— чет өлкөлүк банктар аркылуу жүргүзүлгөн транзакциялар үчүн транзакция салыгынын ставкасы 0,1 пайызга чейин төмөндөтүлдү (азыркы ставка — 0,2 пайыз);

— мурда алып келинген же өндүрүлгөн баалуу металлдардан жасалган зергер буюмдардын калдыктарын легалдаштыруу каралып, легалдаштыруу мезгилинде салык органдары тарабынан жүргүзүлүүчү текшерүүлөргө мораторий киргизилет;

— баалуу металлдардан жасалган зергер буюмдарын ыктыярдуу негизде ата мекендик өндүрүүчүлөр тарабынан өз эн белгиси менен (мамлекеттик пробирдик белги эске алынбайт) сыноо жана белгилөө функциялары берилет, ошондой эле пробирдик жыйымдын ставкаларын төмөндөтүү маселеси каралат;

— алкоголдук продукцияны чекене сатууга лицензиялоо жоюлат;

— салык талаш-тартыштарын кароо арбитраждык (третей) соттордун карамагынан чыгарылат.