Паспорт жана башка документтер 34%га кымбаттадыбы?
Депутат Дастан Бекешев мамлекеттик документтерге, түрдүү маалымкат кагаздарга баа көтөрүлгөнүн парламент жыйынында сүйлөп жатып айтты.
Бекешев Министрлер Кабинетинин тѳрагасы демилгелеген “Баа түзүү жөнүндө” мыйзамга өзгөртүүлөрдү киргизүү тууралуу” мыйзам долбоору каралып жатканда мамлекеттик кызмат көрсөтүү акысы эселеп өскөнүн айтты:
"Түрдүү маалымкаттар, өзүбүз басып чыгарып жаткан паспорт жана башка бардык документтер эселеп кымбаттады. Кадимки эле маалымкат 500 сом турат. Калкты тейлөө борборуна кирсең баа 34% чейин өсүп кеткен. КТБ өзүнчө эле бизнес-долбоор болуп алды. Мамлекеттик тейлөө акысы кайда өсүп баратат? Эл нааразы. Монополияга каршы жөнгө салуу кызматы эмне үчүн унчукпайт?",-деди ал.
Дастан Бекешев кызмат көрсөтүү да товар, азык-түлүк сыяктуу эле сатыларын белгилеп, социалдык маанидеги товарлардын баасын 34% көтөрүүгө каршылыгын билдирди. Ал Монополияга каршы тескөө органы мамлекеттик кызмат акыны жана башка бааларды да карап, тескөөгө тийиштигин эскертти.
