Жасалма интеллект кирешелер теңсиздигин күчөтөбү?
Жакынкы жылдары жасалма интеллект кирешелердин теңсиздигин күчөтүшү мүмкүн, бирок массалык жумушсуздукка алып келбейт. Мындай пикирди Barclays инвестициялык банкынын экономикалык изилдөөлөр бөлүмүнүн жетекчиси Кристиан Келлер Дүйнөлүк экономикалык форумга берген маегинде билдирди.
Анын айтымында, жасалма интеллекттин жумуш менен камсыздоого тийгизген таасири эки тараптуу. Айрым процесстердин автоматташтырылышы жумуш орундарын кыскартса, технологияны курал катары колдонуу эмгек өндүрүмдүүлүгүн жогорулатып, кызматкерлердин кирешесин көбөйтөт.
"Маселе жумушсуздукта эмес, кирешелердин теңсиздигинин өсүшүндө. Жасалма интеллектти өндүрүмдүүлүктү жогорулатуучу курал катары колдонгондор көбүрөөк киреше табышат, ал эми башкалардын кирешеси басым алдында калышы мүмкүн", — деди Келлер.
Келлер ошондой эле узак мөөнөттүү келечекте жумуш орундарын жоготуу тууралуу кооптонуулар бар экенин белгилеп, бирок 2025-жылы дал ушул жасалма интеллект дүйнөлүк экономиканы колдоонун негизги факторлорунун бири болгонун кошумчалады.
"Жасалма интеллектке болгон ири инвестициялык бум соода согуштарынын терс таасирлерин олуттуу түрдө жапты. Бул фактор болбосо, экономикалык көрсөткүчтөр кыйла алсызыраак болмок", — деди Barclays өкүлү.
