Кыргызстан банктарынын минималдык уставдык капиталы 3 млрд сомго жеткирилет
Улуттук банк башкармалыгы коммерциялык банктар үчүн уставдык жана өздүк капиталдын минималдуу өлчөмдөрүн белгиледи. Тийиштүү чечим Улуттук банк башкармалыгынын 2025-жылдын 29-декабрындагы токтому менен бекитилди.
Документке ылайык, жаңыдан түзүлүп жаткан коммерциялык банктар үчүн, анын ичинде чет өлкөлүк банктардын филиалдарынын капиталына болгон талаптарды кошкондо, уставдык капиталдын минималдуу өлчөмү 3 млрд сомдон кем эмес деңгээлде белгиленди.
Ал эми иштеп жаткан коммерциялык банктар үчүн уставдык капиталдын минималдуу өлчөмүн баскыч-баскычы менен жогорулатуу каралган:
- 2026-жылдын 30-июнуна чейин — 800 млн сом;
- 2026-жылдын 1-июлунан тартып — 1 млрд сом;
- 2027-жылдын 1-июлунан тартып — 1,5 млрд сом;
- 2028-жылдын 1-июлунан тартып — 2 млрд сом;
- 2029-жылдын 1-июлунан тартып — 2,5 млрд сом;
- 2030-жылдын 1-июлунан тартып — 3 млрд сом.
Системалык мааниге ээ коммерциялык банктар үчүн өзүнчө норматив белгиленди — уставдык капиталдын минималдуу өлчөмү 8 млрд сомдон кем эмес болушу керек. Бул талап 2027-жылдын 1-июлунан тартып күчүнө кирет.
