"Кыргызалтын": Алтын куймаларга суроо-талап өсүүдө
Акыркы күндөрү алтын куймаларына болгон суроо-талап өсүп, "Кыргызалтын" ААКтын алтын сатып алуу бөлүмүндө узун кезек жаралды. Бул тууралуу ишкананын басма сөз кызматынан билдиришти.
Маалыматка ылайык, "Кыргызалтын" учурда 1, 5 жана 10 граммдан жогору салмактагы алтын куймаларын сатыкка коюуда.
Ишканадан белгилешкендей, акыркы мезгилде эл арасында алтынды белекке берүү кеңири жайыла баштады. Ал тургай той-топурларга акчага кошумча катары алтын берүү да адатка айланууда. Мунун негизги себеби — алтындын баасынын күн сайын өсүшү.
"Алтынды сатып алып сактап коюу пайдалуу деп эсептегендер көбөйдү. Ошондуктан алтын алууну каалагандардын саны артып, кезек жаралууда", — деп айтылат маалыматта.
Ошондой эле ишканадан белгилешкендей, буга чейин өлкөдө казылып алынган алтындын көп бөлүгү сыртка чыгарылып кеткен. Маселен, Кумтөр кенинен 410 тоннадан ашык алтын өлкөдөн чыгып кеткен.
Учурда алтын куймаларды өлкө ичинде сатыкка чыгаруу калк үчүн инвестициялык мүмкүнчүлүк катары каралууда.
