Өлкөдө каттоого алынган кылмыштуулук 78%га азайганы айтылды
Акыркы жылдары милиция кызматкерлеринин айлык маяналары эки эсеге жогорулатылды. Бул тууралуу министрлер кабинетинин төрагасы Адылбек Касымалиев бүгүн милиция кызматкерлерин кесиптик майрамы менен куттуктаганда билдирди.
Анын айтымында, акыркы төрт жылда ИИМдин автопаркы 95 пайызга жаңыланган.
"Бардык талаптарга жооп берген автоунаалар, күжүрмөн аскердик техникалар алынып, пайдаланууга берилди, 200дөн ашуун ар кандай багыттагы объекттер курулуп ишке киргизилди", - деди МинКаб башчысы.
Өкмөт башчысы калкка сапаттуу тейлөө көрсөтүүгө ылайыкташкан Милициянын көчмө кабылдамалары, Санариптик эксперттик борборлор пайдаланууга берилгенин белгиледи.
"Өлкө боюнча 10 миңден ашуун видео-камера орнотулду. Натыйжада өткөн жылдарга салыштырмалуу кылмыштуулуктун катталуусу 78 пайызга азайып, одоно тартип бузуулар 69 пайызга төмөндөгөн", - деди өкмөт башчы.
МинКаб төрагасы маалымдагандай, акыркы жылдары милиция кызматкерлеринин айлык маяналары эки эсеге, ал эми алыскы Баткен жергесиндеги кызматкерлердин айлыгы төрт эсеге жогорулатылган.
"Ал эми 2021-2026-жылдар аралыгында 724 милиция кызматкери батир менен камсыз кылынды", - дейт ал.
