Кыргызстанда 302 миңден ашык адамдын терс насыялык тарыхы бар
Кыргызстанда 1 млн 517 миң жаран насыялык тарыхка ээ, алардын ичинен 302 миң 355 адамдын насыялык тарыхы терс экенин экономика жана коммерция министринин орун басары Беназир Нурланова Жогорку Кеңештин жыйынында билдирди.
Маалыматка ылайык, жаран насыя төлөмүн 90 күнгө кечиктирген учурдан тартып анын кредиттик тарыхы терс болуп эсептеле баштайт.
Депутаттар "Кредиттик маалымат алмашуу жөнүндө" мыйзамга киргизилүүчү өзгөртүүлөрдү карап чыгышты. Ага ылайык, кредиттик маалыматтарды сактоо мөөнөттөрүн кыскартуу сунушталууда:
- оң (позитивдүү) насыялык тарых — жети жылдан беш жылга чейин;
- терс (негативдүү) насыялык тарых — беш жылдан үч жылга чейин.
Мындан тышкары, 10 миң сомдон аз суммадагы кредиттик келишимдер боюнча терс насыялык маалымат бир жыл бою гана сакталат деген норма сунушталууда.
Жогорку Кеңештин депутаттары мыйзам долбоорун биринчи окууда кабыл алышты.
