Транзакцияга салыкты 0,1%га чейин төмөндөтүү сунушталды
Мамлекеттик салык кызматы банк секторунун жана Кыргызстан банктарынын бирикмесинин өкүлдөрү менен жолугушуу өткөрдү.
Салык кызматынан билдиришкендей, жолугушууда салык мыйзамдарына киргизилип жаткан жаңы өзгөртүүлөр, анын ичинде "Транзакцияга салык" атайын салык режими жана 2025-жылдын 31-декабрындагы Мыйзамга ылайык, бул салыктын ставкасын 0,2%дан 0,1%га чейин төмөндөтүү маселеси талкууланды.
Ошондой эле транзакцияга салыкты башкаруу процесстерин автоматташтыруу, маалымат алмашууну жеңилдетүү жана кызматташтыкты күчөтүү багытындагы иштер каралды.
Салык мыйзамдарына ылайык, банк эсеп ачылган учурда транзакцияларды жүргүзүүдө салык агенти катары бул салыкты кармап, бюджетке төлөп берет.
Транзакцияларды жүргүзгөн субъекттер "Транзакцияга салык" атайын салык режимин гана колдонууга тийиш. Бул режимдин алкагында Кыргыз Республикасынын аймагында башка ишмердүүлүк менен алектенүүгө тыюу салынат.
Транзакциялык иш жүргүзгөн салык төлөөчүлөр атайын салык режимин колдонуу тууралуу арызды 2026-жылдын 1-февралына чейин салыктык катталган жери боюнча салык органына тапшырууга милдеттүү.
