Балык уулоо билеттерин онлайн сатуу бюджетке 13,5 млн сом алып келди

2025-жылдын жыйынтыгы боюнча балык уулоо билеттерин жана карточкаларын сатуу аркылуу бюджетке 13 млн 573 миң сом түшкөн. Бул көрсөткүч 2024-жылга салыштырмалуу (3,1 млн сом) бир нече эсеге жогору. Өсүшкө онлайн билет сатуу системасынын киргизилиши негизги себеп болду. Бул тууралуу Айыл чарба министрлигинен билдиришти.

Балык өнөр жайы комплекси департаменти тарабынан 2025-жылга карата республиканын суу объектилеринде спорттук-ышкыбоздук балык уулоонун лимиттери бекитилип, алар Улуттук илимдер академиясынын Биология институту менен макулдашылган.

Балык уулоону тартипке салуу максатында коомдук бирикмелер жана жеке ишканалар менен келишимдер түзүлгөн. Учурда жарандар балык уулоо билетин agro.gov.kg сайты аркылуу онлайн сатып алып, төлөмдү мобилдик банк тиркемелери же электрондук капчыктар аркылуу жүргүзө алышат. Электрондук билет катталган электрондук почтага жөнөтүлөт жана республика боюнча жарактуу.

Онлайн система кызмат көрсөтүүнү жеңилдетип, кагаз документтерди азайтып, балык уулоону өлкөнүн бардык аймактарында жеткиликтүү кылды. Мындан ары электрондук сервистерди өнүктүрүү жана балык уулоонун лимиттерин сактоого көзөмөлдү күчөтүү пландалууда.