Экономика министрлиги 4 жыл ИДП өсүшү 10,2% болгонун билдирди
Садыр Жапаровдун президенттик кызматтагы беш жылдык мезгилинде Кыргыз Республикасынын экономикасында олуттуу сапаттык жылыштар орун алганын Экономика жана коммерция министрлигинин басма сөз кызматы билдирди.
Ведомствонун маалыматына ылайык, жүргүзүлүп жаткан экономикалык саясаттын жыйынтыктары ички дүң продуктунун (ИДП) динамикасында даана чагылып, анын өсүшү регионалдык деңгээлде гана эмес, эл аралык масштабда да байкала баштады.
"Тактап айтканда, 2020-жылдын жыйынтыгы боюнча Кыргызстандын ИДПсынын көлөмү 601,8 млрд сомду түзгөн. 2021-жылы бул көрсөткүч 723,1 млрд сомго жетип, экономикалык калыбына келүүнүн башталышын белгиледи.
2022-жылы ИДПнын көлөмү 1 трлн 21 млрд сомду түзүп, алгачкы жолу психологиялык мааниге ээ болгон 1 трлн сомдук чекеден ашты.
2023-жылы көрсөткүч 1,2 трлн сомго жетсе, 2025-жылдын жыйынтыгы боюнча ички дүң продуктунун көлөмү 1 трлн 976,4 млрд сомго чейин өсүп, иш жүзүндө 2 трлн сом деңгээлине жакындады", — деп айтылат маалыматта.
Экономика министрлиги кошумчалагандай, акыркы төрт жыл ичинде ИДПнын реалдуу өсүшүнүн орточо жылдык темпи 10,2%ды түздү.
