Өзбекстан Кыргызстандан кант, сүт азыктарын жана картошка алууга кызыкдар
Күн мурун Экономика жана коммерция министрлигине караштуу Кыргызстандын Өзбекстан Республикасындагы Соода өкүлчүлүгү Өзбекстан Республикасынын Тамак-аш өнөр жайы ассоциациясынын башкармалыгынын төрагасы Баходир Умиршайхов менен жумушчу жолугушуу өткөрдү.
Министрликтин маалыматына ылайык, жолугушууда Соода өкүлчүлүгү Кыргызстандын экспорттук потенциалын тааныштырып, агроөнөр жай комплекси жана тамак-аш өнөр жайы тармагындагы ата мекендик өндүрүүчүлөрдүн мүмкүнчүлүктөрү тууралуу маалымат берди.
Өз кезегинде Өзбекстан Республикасынын Тамак-аш өнөр жайы ассоциациясы Кыргызстандан кант, сүт азыктары, картошка жана тамак-аш өнөр жайы үчүн чийки заттарды жеткирүүгө кызыкдар экенин билдирди.
Ошондой эле тараптар соода-экономикалык кызматташтыкты кеңейтүү, эки өлкөнүн ишканаларынын ортосунда түз ишкердик байланыштарды өнүктүрүү жана тамак-аш өнөр жайы тармагында өнөктөштүктү чыңдоо маселелерин талкуулашты.
