Ак-Суу районунда туризм мектебин куруу талкууланды
Билим берүү министрлигинде министр Догдуркүл Кендирбаева Австрия Республикасынын Федералдык финансы министрлигинин өкүлү Михаэль Маттиащиц менен жолугушту.
Министрликтин басма сөз кызматы билдиргендей, бул жолугушуу 27-январда өткөн онлайн-жолугушуунун уландысы болуп саналат. Онлайн-жолугушууга Австриянын Экономикалык кызматташтык жана өнүктүрүү агенттиги, ошондой эле Австриянын өнөктөш уюмдары жана билим берүү мекемелери катышкан.
Тараптар Ысык-Көл облусунун Ак-Суу районунда туризм мектебин түзүү долбоорун талкуулашты. Кыргыз тарап жаңы типтеги мектепти куруу жана өнүктүрүү, ошондой эле тоо туризми тармагында адистерди даярдоо үчүн каржылык жана методикалык колдоо көрсөтүү сунушу менен чыкты.
Михаэль Маттиащиц бул демилгени колдой турганын билдирип, мындан ары да сүйлөшүүлөрдү улантууга даяр экенин айтты. Ал ошондой эле каржылоо маселелери Австриянын мамлекеттик жана жеке институттары менен талкууланарын кошумчалады.
Өз кезегинде Догдуркүл Кендирбаева мындай долбоорлордун ишке ашырылышы туристтик билим берүүнү өнүктүрүүдө жаңы мүмкүнчүлүктөрдү ачып, эл аралык кызматташтыкты бекемдей турганын белгиледи.
