Россия Мамдумасы Кыргызстандын ЕАЭБге жолдогон арызы боюнча жооп кылды
Мамлекеттик думанын саламаттык сактоо боюнча комитетинин төрагасы Сергей Леонов Россиянын мигранттардын үй-бүлөлөрүнө медициналык полис берүүдөн баш тартуусуна байланыштуу Кыргызстандын Евразиялык экономикалык биримдиктин (ЕАЭБ) сотуна кайрылуусуна комментарий берди.
Анын айтымында, Кыргызстан жарандары Россияда кошумча медициналык камсыздандыруу полисин ала алышат.
"Иштеп жүргөн мигранттар жана алардын үй-бүлө мүчөлөрү өз каражатына кошумча медициналык камсыздандыруу полисин сатып алып, медициналык кызмат көрсөтүүлөрдөн пайдалана алышат", — деди ал.
Сергей Леонов ошондой эле төмөнкүлөрдү белгиледи:
"Биздин позиция бир болушу керек — поликлиникаларыбыз чет элдик жарандарга ашыкча жүктөлбөшү керек. Иштеп жаткан иммигранттардын үй-бүлө мүчөлөрүндө өз каражатына полис сатып алып, медициналык жардам алуу мүмкүнчүлүгү бар. Мигранттар шашылыш медициналык жардам алууга толук укуктуу, андан баш тартылбайт. Бирок эмне үчүн биз алардын поликлиникалардагы дарылануусун өз бюджетибизден төлөшүбүз керек?" — деди ал.
Эске салсак, буга чейин Кыргыз Республикасы эмгек мигранттарынын үй-бүлөлөрүнө милдеттүү медициналык камсыздандыруу полистерин берүүдөн баш тартуу фактыларына байланыштуу түшүндүрмө берүү өтүнүчү менен ЕАЭБ сотуна кайрылган. Соттун чечими эки жуманын ичинде чыгары күтүлүүдө.
