Tunduk travel долбоорун ишке киргизүү боюнча документке кол коюлду
Санариптик өнүгүү министрлигинде туристтер үчүн улуттук санариптик платформа болгон Tunduk travel долбоорун ишке киргизүүгө негиз түзгөн негизги документтерге кол коюлду.
Tunduk travel тиркемеси "бирдиктүү терезе" принциби менен иштелип чыгууда. Анын жардамы менен туристтер мамлекеттик жана сервистик кызматтарды, пайдалуу маалыматтарды, ошондой эле бизнес-сервистерге жеткиликтүүлүктү ала алышат. Платформа этап-этабы менен өнүгөт: алгач негизги функциялар ишке киргизилип, андан соң тестирлөө жүргүзүлүп, мүмкүнчүлүктөрү акырындап кеңейтилет.
Долбоордо коопсуздук маселесине өзгөчө көңүл бурулат. Платформа колдонуучулардын жеке маалыматтарын коргойт, ведомстволор ортосунда маалыматтардын коопсуз алмашуусун камсыз кылат, ошондой эле туристтерге өзгөчө кырдаалдарда жардам берет.
Колдонуучулар өлкөдө болуу эрежелери, туристтик маршруттар, аба ырайынын шарттары жана жеткиликтүү аймактар тууралуу маалыматты алдын ала ала алышат. Зарыл учурда тез арада шашылыш кызматтар менен байланышууга мүмкүнчүлүк болот.
Ведомстводо белгилешкендей, Tunduk travel — бул бир жолку IT-продукт эмес, узак мөөнөткө багытталган мамлекеттик санариптик экосистема. Ал республиканын туристтик тармагы менен бирге өнүгүп, туризмдин ыңгайлуулугун, коопсуздугун жана сапатын жогорулатууга багытталган инструментке айланат.
Долбоорду ишке ашыруу туристтин өлкөгө кирген учурдан тартып сапары аяктаганга чейинки жолун жөнөкөйлөтүүгө, туристтик бизнести өнүктүрүүгө жана тармактагы ачык-айкындуулукту жогорулатууга багытталган.
