Алтын баасынын өсүшү глобалдык экономикадагы олуттуу көйгөйлөрдү көрсөтөт
Дүйнөлүк рынокто алтындын баасынын өсүшү глобалдык экономикада жана финансылык тутумда олуттуу көйгөйлөр бар экенинен кабар берерин экономист Улукман Маматов радио эфиринде билдирди.
Анын айтымында, алтындын баасынын жогорулашы кокустук көрүнүш эмес.
"Алтындын баасынын өсүшү — глобалдык тобокелдиктердин, инфляциянын жана финансылык рыноктордогу туруксуздуктун чагылышы. Бул Улуттук банкка, биздин резервдерге жана алтын казып алуу менен алектенген “Кумтөр”, “Кыргызалтын” сыяктуу компанияларга пайдалуу. Бирок калк үчүн инфляциялык басым азыртадан эле сезиле баштады. Ошондуктан резервдердин өсүшүн бир гана оң көрсөткүч катары кабыл албастан, салмактуу жана өз убагындагы чечимдерди кабыл алуу өтө маанилүү", — деди ал.
Экономисттин айтымында, геосаясий чыңалуу, анын ичинде Батыш өлкөлөрүнүн саясаты жана АКШ администрациясынын аракеттери да алтын баасынын өсүшүнө таасир этүүдө.
Улукман Маматов алтын-валюта резервдерин жана алтынды виртуалдык активдерди чыгарууда камсыздоо катары пайдаланууну сунуштады. Анын пикиринде, бул алтынды сатпай туруп инвестиция тартууга мүмкүнчүлүк берет. Ошол эле учурда, дүйнөлүк кризис күчөгөн шартта алтын өлкөнүн стратегиялык резерви жана экономикалык туруктуулуктун булагы катары сакталып калат.
Ошондой эле экономист санарип сомду киргизүү туура кадам экенин белгилеп, бирок анын улуттук валютага байланганын эскертти.
"Эгер кризис шартында сом алсырай турган болсо, санарип сом да ошол эле тобокелдиктерге туш болот. Менин оюмча, экинчи, көбүрөөк обочолонгон финансылык контурду — шарттуу түрдө “алтын сомду” же алтын резервдери жана тоо-кен тармагынын ресурстары менен камсыздалган виртуалдык активди түзүү зарыл. Мындай стратегиялык даярдык көрүүгө азырынча убакыт бар", — деди Маматов.
