Баалуу металлдар рыногу 7 трлн доллар жоготту
Дүйнөлүк баалуу металлдар рыногу буга чейин болуп көрбөгөндөй кескин төмөндөөгө туш болду. Болгону 36 сааттын ичинде бул сектордун жалпы капитализациясы 7 трлн доллардан ашык кыскарды. Эксперттер бул окуяны акыркы ондогон жылдардагы эң ири рыноктук төмөндөө катары баалашуууда деп жазат Bloomberg.
Эң чоң төмөндөө күмүштө катталды. Анын баасы 30%дан ашыкка түшүп, унциясы 85 доллардан ылдый төмөндөдү. Натыйжада бул сегменттин рыноктук баасы болжол менен 1,96 триллион долларга азайды.
Адатта коргоочу актив катары эсептелген алтын да арзандады — анын баасы 13,6%га төмөндөп, унциясы 4,9 миң доллардан ылдый түштү. Бул алтындын жалпы капитализациясынын 5 трлн долларга кыскарышына алып келди.
Кризис платина тобуна кирген башка металлдарды да камтыды.
Платинанын баасы 27,25%га төмөндөп, унциясы 2,1 миң доллардан төмөн деңгээлде бекитилди. Бул металлдын рыноктук жоготуусу 215 миллиард долларды түздү.
Палладий болсо 21,5%га арзандап, унциясы 1,7 миң доллардан төмөн түштү. Натыйжада анын рыноктук наркы болжол менен 85 млрд долларга азайды.
Баалардын кескин өзгөрүшү инвесторлор арасында паника жаратып, дүйнөдөгү ири биржаларда позициялардын массалык түрдө жабылышына алып келди. Аналитиктер бул абалды макроэкономикалык факторлордун жыйындысы менен түшүндүрүшөт, бирок төмөндөөнүн ылдамдыгы заманбап каржы тарыхында теңдеши жок экенин белгилешет.
