Министр Бакыт Төрөбаев дыйкандарга карбоминтти колдонууну сунуштады
Айыл чарба министри Бакыт Торобаев "Кыргызмамасылтукум" заводунун себүү талааларын кыдырып, минералдык жер семирткичтер – карбоминтти колдонуу жана анын түшүмдүүлүктү жогорулатууга тийгизген пайдасы тууралуу маалымат берди.
Министрдин айтымында, 50 гектар аянтка агротехникалык талаптарга ылайык күзгү буудай себилген. Себүүдөн мурда топурак анализи жүргүзүлүп, негизги элементтер – фосфор, калий жана азот жетишсиз экени аныкталган.
Бул заттарды толуктоо үчүн талааларга карбоминт чачылды. Минералдык жер семирткичтерди жана сертификатталган урукту колдонуу менен аталган аянттан гектарынан 60 центнерге чейин түшүм алуу күтүлүүдө.
Бакыт Торобаев карбоминт – бул топуракты азыктандыруучу, өсүмдүктөргө керектүү элементтерди (азот, фосфор, калий) берчү минералдык жер семирткич экенин белгиледи. Аны буудай, жүгөрү, картошка жана башка айыл чарба өсүмдүктөрүн өстүрүүдө колдонсо болот. Жер семирткич гранулданган формада атайын РУМ техникасы менен талаага бирдей чачылат.
Ошондой эле министр дыйкандар тарабынан кетирилип жаткан катачылыктарга көңүл бурду — сорнякка каршы каражаттарды туура эмес колдонуу жана сертификатталбаган урукту колдонуу. Бул түшүмдүүлүккө жана продукциянын сапатына терс таасирин тийгизет.
Мындан тышкары, өлкө боюнча 22 лаборатория иштеп жатканын, дыйкандар ал жактардан уруктун сапатын жана курамын текшерип же сертификатталган себүүчү материалды сатып ала алары маалымдалды.
