Россия 1-сентябрдан тарта өлкөдөн рубль, алтын чыгарууга атайын чек коет
Россиянын бийлиги 2026-жылдын 1-сентябрынан тартып накталай рублдерди жана куйма түрүндөгү алтынды өлкөдөн алып чыгууга чектөө киргизүүнү пландап жатканын "Интерфакс" агенттиги маалымдады.
Документке ылайык, жеке адамдарга ЕАЭБге мүчө өлкөлөргө учурдагы курс боюнча 10 миң доллардан ашкан накталай рублдерди алып чыгууга тыюу салынат.
Мында эл аралык аэропорттор өзгөчө учур катары каралат. Бирок бул учурда жарандар бажы органдарына милдеттүү түрдө билдирүү бериши керек. Билдирүүдө каражаттын келип чыгышы жана аны пайдалануунун максаты көрсөтүлүүгө тийиш.
Эгерде сумма 100 миң доллар көлөмдөн ашса, бажы органдары акчанын мыйзамдуу экенин тастыктаган расмий документтерди талап кылат.
Юридикалык жактар жана жеке ишкерлер (ЖИ) үчүн бажы төлөмсүз алып чыгуу боюнча чектөө каралган эмес. Алар накталай рублдин каалаган көлөмүн эл аралык аэропорттор аркылуу гана жана тиешелүү органдарды милдеттүү түрдө кабардар кылуу шарты менен алып чыга алышат.
Чектөөлөр баалуу металлдар рыногуна да тиешелүү болот. Жеке адамдарга жалпы салмагы 100 граммдан ашкан алтын куймаларын алып чыгууга тыюу салынат.
Алтынды эркин алып чыгууга Шереметьево, Домодедово, Внуково жана Владивосток аэропорттору аркылуу гана, ошондой эле Пробир палатасынан атайын уруксат болгондо жол берилет.
Жаңы талаптар кредиттик уюмдарга тиешелүү эмес.
