Кыргызстандын минералдык ресурстарынын көлөмү 177 млрд доллар турат – Аскар Сыдыков
Кыргызстанда минералдык ресурстардын жалпы көлөмү 177 млрд долларга бааланарын "B5+1" бизнес-форумунун алкагында өткөн "Критикалык минералдар боюнча B5+1 диалогу" аттуу панелдик сессияда Эл аралык ишкерлер кеңешинин аткаруучу директору Аскар Сыдыков билдирди.
Анын айтымында, республикада 1 миңден ашуун кен жай катталган, бирок алардын жарымынан азы гана иштелип жатат.
"Дүйнөдө критикалык деп таанылган 20 минералдын ичинен биздин өлкөдө болгону жети минерал гана активдүү түрдө өздөштүрүлүп жатат", — деди Аскар Сыдыков.
Ал бул тармакты активдүү өнүктүрүү үчүн заманбап технологиялар, квалификациялуу кадрлар жана капитал талап кылынарын белгиледи. "Геологиялык маалыматтардын жеткиликтүүлүгүнө салынган ар бир доллар 7,3 доллар киреше алып келет", — деп кошумчалады Эл аралык ишкерлер кеңешинин жетекчиси.
Ошондой эле Аскар Сыдыков Кыргызстан азырынча GORC эл аралык стандарттарына жана геологиялык маалыматтарды жүргүзүүнүн башка инновациялык ыкмаларына өтө электигин белгиледи.
