Кыргызстандын 8 ишканасы Кытайга товар экспорттоого уруксат алды
12-февраль 2026-жылдан тартып Кытай Эл Республикасынын Башкы бажы башкармалыгы Кыргызстандын сегиз ишканасын Кытай рыногуна экспорт жүргүзүүгө уруксат берилген ишканалардын тизмесине киргизди. Бул тууралуу Айыл чарба министрлигинин басма сөз кызматы билдирди.
Чечим Ветеринария, мал чарбасын, жайыттарды жана тоюттарды өнүктүрүү кызматы жүргүзгөн иштердин жыйынтыгында кабыл алынган.
Тизмеге төмөнкү ишканалар кирди:
"Ат Башы Трейд" ЖЧКсы,
"Алия" ЖЧКсы,
"Гермес Ко ЛТД" ЖЧКсы,
"Жол-Аман" ЖЧКсы,
"Таалай Групп" ЖЧКсы,
"Wool KG" ЖЧКсы,
"Опэн Трейд" ЖЧКсы,
"Торугарт Трейд" ЖЧКсы.
Бул ишканалар ири мүйүздүү малдын терисин жана кой-эчкинин жүнүн кайра иштетүү менен алектенишет.
Экспортко уруксат алуу ата мекендик өндүрүүчүлөргө экспорт көлөмүн көбөйтүүгө жана Кыргызстан менен Кытайдын ортосундагы соода-экономикалык кызматташтыкты өнүктүрүүгө кеңири мүмкүнчүлүк түзөт.
Ветеринария кызматында белгилешкендей, Кытай рыногуна жаңы ишканаларды чыгаруу жана экспортко уруксат берилген кыргыз продукциясынын тизмесин кеңейтүү боюнча иштер улантылып жатат.
