"ЧОИ-2030": Кыргызстанда ишкерликти өнүктүрүүнүн жаңы багыттары аныкталды
Күн мурун Бишкекте Кыргызстандын чакан жана орто ишкерлигин колдоо жана өнүктүрүүнүн 2030-жылга чейинки "ЧОИ-2030" программасынын долбоорун талкуулоого арналган стратегиялык сессия өттү. Бул тууралуу Экономика министрлигинен билдиришти.
Иш-чарага КРнын Экономика жана коммерция министрлиги, БУУӨП, ЕККУ, Евразия өнүктүрүү банкы, эксперттер жана өлкөнүн бизнес-коомчулугунун өкүлдөрү катышты.
Программанын негизги максаты — ишкердикти колдоонун өзүнчө чараларынан бирдиктүү, ачык-айкын жана натыйжалуу улуттук системага өтүү. Бул багытта чакан жана орто ишкердик субъекттерин колдоо институттарынын Консорциуму түзүлгөн.
КР Экономика жана коммерция министри Бакыт Сыдыков чакан жана орто бизнес өлкөнүн туруктуу өнүгүүсүнүн негизги таянычы экенин белгилеп, ар бир жаранга бизнес баштоого жана өнүктүрүүгө тең мүмкүнчүлүк түзүү — мамлекеттин приоритети экенин айтты.
Талкуунун жүрүшүндө ишкерлер 5 негизги багыт боюнча сунуштарын беришти:
- финансылык колдоо (жеңилдетилген кредиттер, кепилдиктер, инвестиция тартуу);
- аймактарды өнүктүрүү жана экспорт;
- санариптик трансформация ("ЧОИ Хаб" платформасы);
- укуктук коргоо жана административдик тоскоолдуктарды азайтуу;
- инновациялар жана креативдүү экономика (аялдар ишкердиги, жаштар стартаптары).
Сессиянын жыйынтыгында бардык сунуштар ЧОИни өнүктүрүүнүн 2030-жылга чейинки Программасынынакыркы версиясына киргизилери белгиленди. Жарандар жана ишкерлер msb2030.gov.kg сайты аркылуу да программаны талкуулоого катышып, өз сунуштарын бере алышат.
